في ذكر اللبنانية التي احببت .. تركتني وحيدا اعيش مرارة فراقها

ربما يكون الفراق

كانت نسمة هواء عليل تداعب وجنات عاشق هام في حبها لحظات عشق جميل ذاب فيها وعاش أياما وشهورا يلامس بخياله أطراف اصابعها الدقيقة البيضاء وأنفها الصغير تعتليه حمرة برد اصابها فتلون خداها بلون وردي فاتح كخجل عذراء ارتفع ثوبها فكشف عن ساقيها .. شعرت ان ريحا تهب فجأة فتحملني اليها اركز ناظري ناحية عينيها البنية التي تصنع تباينا ربانيا مع بشرتها البيضاء الشفافة، وشفتاي تقتربان من شفاه اعتقد انها اختفت وسط خجل أو ايمان منعها أن تجاريني في مطلبي الخيالي وان تمنحني سر الخلود من تلك الشفتين .
ضربت يدي في قلبي لأجتث لها كل ذرة كره بداخلي لتتأكد أن حبها انتزع مني الكراهية وزرع في أعماقي بذورا غريبة برائحة عطرة ونمو سريع استعجبت منه لكنني استمتعت به فقد غير من حياتي ومنحني قوة لم أعتدها من قبل قد تكون شعرت بها من سعة حبي لها واشتياقي لضمها حتى تجتمع ضلوعي بضلوعها لنكون سويا كائنا سرمديا منالعشق والحب يكون وجوده في الدنيا امداد للمحبين بجرعات حب مركزة وعشق خالص دون أن تختلط به رغبات او نزوات حيوانية . أن نكون بعد اندماجنا شجرة حب عملاقة جذورها مروية بماء الهوى وفرعها هيام واوراقها سهام كيوبيد تصيب المارين بجوارنا فتدخلهم حالة متفردة عشانها وسط اجتماعنا منذ الاف السنين .
تركتني لأحيا مرارة فراق المني وجعلني وحيدا لأأقوى على مجاراة نفسي ولا استطيع كبح جماح تفكيري بها طوال الوقت تركتني لأفكر في اشياء لا علاقة لها بما بنيناه سويا حيث كنا قد اتفقنا على ان اطير اليها مع السحاب وان نتزوج ونفعل سويا ما نشاء وان يجمعنا بيت واحد وغرفة واحدة وسرير واحد لا يفصلنا فيه سوى بقايا ذرات هواء اجتمعت لتكون حدا فاصلا بين جسدي الملتصق بها وكنا قد اتفقنا ذات مرة انا ننجب ولدا وبنت نسمي الفتى ادم ولارا كان من نصيب الفتاة وأن ندخلهما جامعات ونشيد لهم قصورا تؤينا جميعا فوق السماء تضيئها النجوم وتزينها الغيوم البيضاء التي ربما كانت قد جاءت محملة بعطر ملائكي يتناسب مع رقة محبوبتي الجميلة فهي الاساس الحقيقي للقمر الذي انتزع منها جزءا ليستطيع أن ينير الليل الذي استطاع أن يحصل هو الآخر على جزء من شعرها الأسود ليحافظ على ما جعله عليه الله .
ضاعت احلامي معها ولم نعد نشعر بقوانا سويا ولا بارتعاشات حبها ولا برجفة قلبي عندما المس جزءا من هذا الجسد البارع الجمال والكمال قد يصفوني بالخروج عن طبيعة الخلق لكنني حقا لم ارى مثلها اي خلق أو بشر ولازلت أشك أن الملائكة لايختلفون عنها كثيرا .
قد يكون القدر ابعدنا لكن لاتزال حواسي تشعر بكل جزء فيها حتى تلك الاجزاء التي لاأعلم عنها شيئا الا انني أعلم انها قطعة مني اختار القدر ان يقتلعها من جسدي ليتركه داميا غارقا في ذكرياته مع هذه اللبنانية التي احبتني..

محمد الشواف

ويحك يا وطن

الفساد بقى ملطخ ايدين الناس ومحدش قادر يقوله لأاحنا بنطاطي بس مصر مش لازم تطاطي زينا

إذا كانت حياتنا مليئة بالألم والنحيب والصراخ ..إذا كانت حياتنا ترضعنا المذلة والظلم

والضياع .. لم الحياة في وطن لا نجيد فيه إلا أن نكون مطأطأي الرؤوس ومفككي الصفوف ؟..لما الحياة في وطن يلفظنا ويرمينا في غياهب بحر مظلم ؟.. لما الحياة في وطن وصل فيه الفساد مداه وأصبح الأب يعظ ابنه بالخضوع والمحاباة ؟.. لم الحياة في وطن أصبحت فيه الأمهات يبكين على أطفالهن الذين داست عليهم براثن الظلم وأقدام الطغاة ؟.. لم الحياة في وطن أصبح فيه الكريم لئيما والفاسدون فيه هم اسياد الحياة؟.. لم الحياة ؟
يمر اليوم وفي ذيله تلتصق آهات وعبرات وآلام ..تلتصق فيه دماء آلاف الضحايا و دموع أم مكلومة فقدت مستقبلا سهرت لأجله وتحملت مر الأيام السوداء التي يحياها شعب أصبح مكبلا بالأصفاد والهموم والخوف .
سواد تتشح به السماء يطلقون عليه سحابة سوداء وكذبا يقولون أن قش الأرز هو المتهم .. إدعاء باطل فالسواد جاء من تلك القلوب التي امتلأت بالحقد والكره والتآمر .. السواد جاء من ألسنة منافق يعيث في الأرض خرابا وتدميرا .
وطن أصبح الناس فيه بلا استثناء مرددين لعبارات المدح والشكر والثناء لمن يرونه الأعلى وفوق كل الأسماء يرونه ولي نعمتهم وممسك رزقهم والمتحكم في أمرهم .. لكن هيهات إنهم فعلا البلهاء لايعرفون أن هناك رباً ينتقم من مثل هؤلاء .
اي وطن ذلك الذي يقبل أن يحيا فيه الناس أمواتا لا يجدون قوت يومهم ولا قوت ساعات أو حتى بقايا وفتات .. وطن فيه المرض أصبح واجبا قوميا لافرار منه كالتجنيد الإلزامي وأصبح الموت في البحر فيه عادة لا تنقطع .. وطن المسافر فيه مسافر للاعودة يقطع تذكرته للقاء ربه على أي شاكلة دون نقاش أكان شهيدا كما يريدون أو طماعا كما عليه يفترون .. وطن فيه المفتي يضع نصب عينيه رضا ولي النعم وشيخ الأزهر فيه قد بلغ من العمر الهِرَم كلامه ليس إلا مجرد خزعبلات واضغاث أحلام قالها الشيخ الجليل وهو من اعتاد في أي مؤتمر أن ينام !
وطن فقد الشعب فيه صوته في اعتصامات واضرابات وهتافات والمسئولون كالأصنام وكأنما فقدوا حاسة السمع أو اصابتهم صدمة من الشعب المسالم الذي ظل خاضعا عبر الأيام اسكتتهم عن الرد أو حتى تحقيق ولو أقل المرام وارضاء من رضوا زمنا بلقمة خبز وكوب ماء ومكان لينام.
الآن لم يعد هناك خبزا ولا ماءً ولا مكان لينام الخبز تسرطن والماء تسمم والأماكن هدمتها المحافظة على السكان .. المرض ينهش شبابا لم يعرف منذ ولد معنى أن يكون سليما جاء منذ مولده ليحيا في وطنه عليلا قائمة من الأمراض تنتظره وعليه فقط أن يختار وبالفعل لن يحتار فالموت هنا مؤكد حتى وإن لم تشأ الأقدار إنه عقاب من الرب لمن رفضوا الوقوف في وجه المدمرين والفجار .. ومن لم يمت بمرض اصطفاه النظام له فليمت غريقا أو حريقا أو حتى تحت القطار .

روائي إماراتي يسخر من القران الكريم ويتهكم علي المسيح والعذراء مريم ..

غلاف الرواية

علي أبو الريش

هل كفر الروائي علي ابو الريش .. سؤال لابد ان يطرحه كل من يقرأ روايته الجديدة التي اهان فيها الاديان كلها

.حيث وظف الروائي الدين والجنس لخدمة نصه دون مراعاة لأي تقاليد ومستهينا بالدينين الاسلامي والمسيحي ضارباً عرض الحائط بكل موروثه الاسلامي في 750 صفحة مارس فيها كل أشكال الكتابة التي تركز علي الهجوم علي الأديان من خلال قفزه علي الواقع وتصويره لا من داخله أو ما يمكن أن يطلق عليه التناقضات الموضوعية بل من خلال إستخدامه للجنس والدين لتحليل العلاقة الاجتماعية بين الناس في حقبة معينة من التاريخ الاجتماعي لاحدي مدن إمارة رأس الخيمة النص جاء تحت عنوان ( ك . ص . ثلاثية الحب والماء والتراب ) ومن البداية تكتشف أن أبو الريش يصطدم مع القران الكريم حيث يبدأ عنوان روايته باسم " ك . ص " والذي يذكرنا علي الفور بسورة مريم التي يقول فيها المولي عز وجل " ك . هـ .ي. ع . ص " وهي تجزئة لقوله عز وجل " كهيعص , ذكر رحمة ربك عبده زكريا ، إذ نادي ربه نداء خفياً ، قال رب إني وهن العظم مني واشتعل الرأس شيباً ، ولم أكن بدعائك رب شقياً " سورة مريم (1-4 ) وبذلك استخدم الروائي علي ابوالريش بداية النص القراني عنواناً لروايته وكأنه باستخدامه الالفاظ التي أقسم بها الله تعالي علي ماحدث لمريم العذراء وانتباذها الشجرة .. نري هذا الكافر يستخدم رموز السور القرانية الكريمة ليرفعها استهزاءاً بالقران أي رمز هذا .. ألم يجد في كل مفردات الحياة وكل ما يشاهده وما يسمع عنه رمزا آخر يستخدمه في روايته غير كتاب اللهتشويه الكافر أبوالريش للقران الكريم لم يتوقف عند عنوان الرواية الذي إستخدمه في المتن أي أنه قصد ذلك وهو ما سنشرحه باذن الله تعالي لاحقاً ، أما بقية العنوان ثلاثية الحب والماء والتراب فـلإن عالم الموجودات ثلاث هي ( الرجل والمرأة والحب بينهما ) كما يطرح في روايته .. أما الماء فيمثله الرجل وأما التراب الذي يجب أن يروي ويسقي بالماء فتمثله المرأة وأما الحب فهو الزني .. هذا بالضبط ما يقولة المؤلف ( ضع بنفسك صفات أخري بعد المؤلف فقد عرفت بنفسك ما يفعله بالقران الكريم ) إذن ماذا يريد هذا الروائي .. هل يريد أن يبث السموم في جسد الامة مستغلاً حالة الهوس الجنسي عند الشباب أم يريد تكفيرنا وتشكيكنا في القران من خلال ربط النصوص الكريمة بالفواحش .. كيف جرأ هذا الرجل علي فعل هذا وكيف جرأ علي أن يمزج بين العفاف الالهي والطهر الرباني للسيدة مريم العذراء وبين هذه التأوهات الجنسية التي تخرج من بين أوراق روايته .الكافر علي أبوالريش لم يقتصر علي ذلك بل جسد السيد المسيح وصوره وقدمه باسم " وعل " وحول والدته السيدة مريم رمز الطهر والعفاف الي امرأة قروية اسمها " شامة " من إحدي قرى جنوب الامارات وتدعي معيريض وهي في العقد الثالث من عمرها الا أنها لم تتزوج بسبب رفضها المستمر للرجال .. حيث تتمرد شامة علي مصير صديقتها غاية التي تزوجت بعد أن مارس حبيبها معها الجنس وهرب منها لتتزوج رجل آخر .. لكن شامة ( التي يشبهها الكافر علي أبو الريش بأنها مريم العذراء ) تجد فلسفتها الخاصة في ثورة التمرد التي وصلت اليها بعد أن اكتشفت أنها حامل في ولد أسمته " الوعل " يقوم بتعديل الاشياء والانحرافات غير الصحيحة .. حيث تنتبذ شامة الي جبل لتنجب الوعل ( ألم تلاحظ ان المؤلف يشبه شامة بالعذراء مريم التي انتبذت إلي شجرة ) لكن انجاب مريم كان إلاهيا كونياً سماوياً يرينا فيه الله حكمته وعبقريته ، أما هنا فان الانجاب كان أرضيا مبتذلا لا غاية فيه ولا منه .. فهل أراد أبوالريش أن يقول لنا أن الحمل الذي تعرضت له السيدة مريم كان أسطورياً من خلال الحمل الذي تعرضت له شامة بطلة روايته المؤلف القذر لم تقتصر اساءته علي السيدة مريم العذراء ولا المسيح عيسي بل تحدث عن آخرين مثل يحيي بن زكريا عليه السلام وكأنه يقول لنا أنه يقصد قصة المسيح والعذراء .. حيث يقدم أبوالريش شخصية اخري وهي شخصية " أبو متراس " الرجل الفاضح المهووس بالجنس والذي يعاني من ازدواج في الشخصية ويعيش خرافة تصوراته لقد أساء علي أبو الريش إلي الفن وإلي الدين وإلي الحقيقة الالهية والي مجتمعة وتعالوا بنا نقرأ مقطع صغير مما كتب ونحن نستغفر الله العظيم علي ذكرنا له حيث يقول المؤلف في صفحة 166 " أصبح الكائن الصغير – الوعل او المسيح – الذي في احشائها متحدثا لبقا ومفكرا فطنا .. شامة لم تعد وحيده في هذا الكهب بل اصبح لها رفيق من صنع يدها – صنع يدها وكأنها هي التي خلقت ابنها وهي التي صنعته – اجل .. الجميل في الامر أنها صاغته بعناية فائقة وبمقاس انساني يتلاءم مع حاجتها هي لذا فانه لابد ان يكون الذكر الوحيد الذي تخشي معاشرته والعيش معه تحت سقف واحد وستقضي معه حياة آمنة دون ان تتوقع منه البطش والخذلان ونكران الجميل " هذا هو الكفر بعينه حيث يشبه" الوعل " بالسيد المسيح يوم أن تكلم في المهد بل إن الوعل عند أبوالريش يتكلم في بطن أمه التي صنعته جميلا وبمقياس انساني وكأن المسيح هو صناعة مريم ومثلما تساءلت مريم العذراء عليها السلام يجعل ابوالريش بطلته شامة تتساءل حيث يقول " شعرت شامة بالقيء عصرت بطنها وتوكأت علي صخرة .. زمجرت كقطة مأزومة ثم أخرجت في جوفها وأخرجت معه مرارة واسي قائلة : يا إلهي ربما حصل ما كنت اخشاه ولكن كيف تم هذا ؟ كيف تم هذا ؟ فشامة تتساءل عن سر حملها لانه لم يمسسها بشر من قبل هذا هو التخريف الذى تحمله رواية " ك ص " ثلاثية الحب والماء والتراب لعلي أبوالريش الذي كفر بالقيم والاعراف والدين فاستحق التكفير حقاً ما دام يحمل افكاراً صادمة وهادمة للفكر القويم والاساس المتين الذي بناه مجتمعنا الاسلامي عبر عصور طويلة من الصراع والدعاوي الصادقة .. هل يريد علي أبوالريش أن يقتفي أثر من كتبوا أعمالا تدعي علي الاسلام باطلاً وعلي العقيدة كفرا وزوراً .. ربما يكون هذا قصده لكن الحقيقة أنه خاض في القران الكريم وتحدث عن نبي من أنبياء الله وسخر منه وسخر مما ذكره القران الكريم عنه ..

اضحك يمكن تفرج

لو حد قلك هتقعد على الجزمة ماتزعلش منه عشان ده بقى متاح دلوقتي وممكن تقعد ع الجزمة فعلا ومن غير زعل

ده نتيجة الانحلال الاخلاقي اللي الناس عايشاه من فترة ربنا يسترها على عصافيرنا ويكفيهم شر الكلاب ذنبه ايه العصفور الكلب ده يعيش مشرد؟

النوم سلطان بصحيح

الحاجة الوحيدة اللي نفسي افهمها هو بيصور مين وهل هو عارف مين دول أصلا ولا صورة للذكرى طيب هيفتكر ايه ياجماعة؟!!لو حد عرف يقولي

في الوقت اللي عمالين ناكل ونشرب ونخترع أكلات في رمضان الغلبان ده من أفغانستان بيجمع فتات الخبز المرمي على الأرض عشان يسد بيه جوعه اللي وصل بيه للضعف ده

التعاون شئ جميل حتى لو كان تعاون عشان الباشا يراضي حبيبته وصاحبه يفضل متشعبط لزوم رضا

الحبيبة الغالية ( البني آدمين ما بيعملوهاش)وتلاقي صاحبه ده عاينهاله لوقت زنقة

دمـــــــــــــــــــــــــــوع

الدموع مش بإيدينا

قد يعتقد البعض أن دموع الرجل دليل على ضعفه وقد يراها آخرون انها دليل على طيبة قلبه وحنانه المنقطع النظير .. هم يرون ذلك ولم يلتفت أحد إلى المرارة التي قد يشعر بها أي انسان عندما يشعر بظلم أو قهر لا يعرفون معنى أن ترتعد خوفا من أن يراك أحدهم تدمع وتمتلئ عيناك بالدموع . تلك الدموع الدافئة التي تلامس وجنتيك الصفراوين بفعل التعب والسهر والغرق في الأمل لن يشعر أحد بأنك مقهور في قلبك صرخات لو وجدت منفذا للعبور فستملأ الدنيا آهات والآم وسيل من العبرات الحزينة .
هكذا هي الحياة لن تحيا سعيدا مهما أتاح لك الدهر من سعادة لن تشعر بفخر بما صنعت لأنهم يرفضون ذلك يرفضون أن تكون ابتسامتك حاضرة في كل وقت وكل حين .
تخرج دمعة رقيقة لتحفر ممرا ضيقا حتى تصل إلى منتهاها تمر في رحلتها لتداعب أنفك فيقشعر بدنك و تشعر بأثرها وقد وقف في حلقك حتى تصل لشفتك العليا لتمر عليها مرور العاجز بين جبلين كي تصل إلى شفتك السفلى وبتلقائية شديدة ستجد لسانك مجبرا على الخروج من ظلمة فمك ليلتقط ما تبقى منها واختلط بمرارة يوم عصيب حتى تعكس لك ما شعرت به فتجد طعمها المر وقد استنكره لسانك معبرا عن غضبه من طعم ما لقيته في يومك المر وما هي إلا لحظات وتكون رفيقتها في غياهب جب عينك المنكسرة قد لحقت بها عبر الممر الدقيق في وجهك الذابل من الحسرة حتى تمتلئ بئرك العطشى من دموعك فتتلاشى مرارة الآمك تدريجيا حتى تزيح عن قلبك المتصلب صدأ الكره والغضب الجم اللذان انتاباك قبيل حفر مجرى الدموع في وجهك .
قد ترى أن الدموع كلها مرارة لكني أقول لك لا ليس الأمر كذلك فأنت لم تستشعر أن يلامس لسانك الغاضب منذ فترة حلاوة دمعة خرجت في صمت وحياء شديدين لتعبر عن فرحة ارتسمت في عينيك فلم تتسع لها لتأبى إلا أن ترتسم دمعة خجلى على خدك الأقرب من ابتسامة سعادتك ، لكن معك الحق فكم هي نادرة هذه الدموع فهي من ندرتها أصبحت قطع لؤلؤ مدفونة في أعماق عين اعتادت أن تكون الأيام قاسية عليها وأن يكون الجميع على موعد مع عذابها الذي أصبح أمرا روتينيا لا فرار منه ليظل ذلك الخندق الضيق يتسع يوما فيوما حتى بات من المؤكد انه سيصبح خندقا خالدا في وجهك الأسير .
لكن هيهات لن تستمر الدموع في مخططها لحفر علامة البؤس والحزن على معالم وجهك ستخرج الصرخة تلو الأخرى لتحدث دويا يقتل كل من تآمر مع دموعك لكي يشوهون وجه البراءة الجميل .

حد متخلف من امريكا بيقيم دعوى قضائية ضد "الله" يتهمه فيها بالارهاب .. كلام بوش خلاهم لسعوا

ده المجنون تشامبرز

في محاولة منه لاثبات وجهة نظره بان النظام القضائي الامريكي يسمح برفع قضايا تافهة لا تستحق، رفع عضو مجلس شيوخ ولاية نبراسكا دعوى قضائية الاسبوع الماضي متهما رب السماء بانه السبب في كثير من القتل والرعب وانه يهدد بالقيام بالمزيد.
يقول السيناتور ارني تشامبرز، اقدم عضو في مجلس شيوخ الولاية، انه يريد اثبات ان اي احد يمكنه مقاضاة اي احد بعدما اغضبته قضية اخرى اعتبرها عبثية.
ورفع تشامبرز القضية امام محكمة ضاحية دوغلاس، اذ انه يمكن محاكمة المدعي عليه هناك باعتباره موجودا في كل مكان كما يقول السيناتور.
وتقول صحيفة الدعوى ان المدعى عليه قام بتهديدات ارهابية ضد السيناتور ومواطني دائرته الانتخابية واشاع بينهم الخوف، وتسبب في "مقتل وارهاب وتدمير وارهاب الملايين من سكان الارض" في إشارة إلى الكوارث الطبيعية التي يشهدها العالم.
والدافع وراء هذه الدعوى هو انزعاج السيناتور من قضية رفعتها امرأة على قاض رفض نظر قضية اغتصاب كانت المرأة قد رفعتها في محكمة أمريكية.
واتهمت المرأة القاضي بأنه انتقص من حريتها في التعبير باعتراضه على استخدام مفردات مثل "اغتصاب" و "ضحية" خلال القضية الأصلية.
وكان القاضي المدعى عليه حكم برفض قضية التحرش الجنسي لان الدعاية الصحفية السابقة على المحاكمة لم تمكن القضاء من استدعاء محلفين محايدين.
هو ده الخبر اللي بيوصف اللي عمله الغبي اللي ما يتسمى ده ، بس هنزعل نفسنا ليه ؟المسألة مش مستاهلة انا عندي وجهة نظر إن الحاجات دي اتفه من ان احنا نلتفت ليها لأن ربنا موجود واحنا مؤمنين انه موجود وكل الخرف اللي بيعملوا شوية الملاحيس اللي شبه الراجل ده مجرد حاجة للشو الاعلامي لا هتودي ولا هتجيب واحنا نحرق دمنا ونطالب ونندد ونهاجم اللي زيه وهو يتشهر ويفرقع وطبعا مش فارقة معاه اصلا ان احنا نتحرق بجاز واعصابنا تتعب .
وانا شايف ان افضل حل لأمثاله من الهطل دول انك تنفضلهم وتتأكد انهم شوية حشرات زي اي ناموسة في الصيف هيجي الشتا ويخفيها أو يبعتلها قرص كيتو رخم يجيب أجلها وربنا يسهل وصاحبنا ده يبتليه بقرص حاجة تانيه يقصف عمره ومش هنقول الا ربنا ينتقم منك ومن بوش اللي خلاكم شايفين كل حاجة على انها ارهاب يا شوية جبناء مهطولة .. بس

محدش يقدر ع الأهلي

حرام كده وكفاية الظلم اللي جماهير الزمالك بيشوفوه ونصيحة للنادي الاهلي كفاية عليهم كده عشان عينيهم مدورة وخايفين عليكم من الحسد وبعدين احنا ورانا افريقيا اللي هما ما سمعوش عنها من فترة يادوب نركز وخليهم في بطولة المركز التاني بتاعتهم قدامهم 3 مراكز لما يوصلوها وربنا يكرمهم بفرقة يغلبوها بقى يادوب كده وللمرة الأخيرة الماتش الجاي أهلي وزمالك بفريق البراعم ومحدش يفاصل ارجوكم خليهم يشموا نفسهم

ومفيش تعليق بعد كده

نفرح بقى كفاية انهم ما اتسحروش يومها

انتهاء موسم تبول العمارات على المارة

خلاص يا جماعة انتهى موسم تبول عمارات مصر على المارة ومفيش حاجة اسمها مية تنزل على دماغك وانت ماشي ، مستغرب سيادتك من حكاية تبول عمارات مصر دي صح؟ ما تستغربش الموضوع ابسط مما تتخيل .بص يا سيدي وما سيدك غيري ( شوية تناكة من نفسي) طول الصيف وانت ماشي في أي شارع في القاهرة مش سيادتك بتلاقي نقط مية نازلة على دماغك ومرة على ايدك ومرة على عدسة النضارة للناس اللي زي حالاتي طبعا بتقعد تنفخ وتقول إف ايه القرف ده مين اللي ناشر غسيل ؟
ده مش غسيل يا ابويا ده التكييف اللي أصبحت عمارات مصر كلها متخرمة شبابيك في الحيطان ومحطوط مكانها تكييفات بخرطوم شكله مستفز ومدلدل كده من غير لازمة وكل شغلته ينقط على الناس حاجة آخر قرف ، ما علينا وطبعا التكييفات اللي انا مش فاهم بتنزل مية ليه _أكيد في سبب_ شغالة 24 ساعة دلوقتي ومحدش ملاحق عليها مية فبقت مصر بتتبول على المارة وتلاقي تحت عمارة من العمارات دي رقعة من المياه زي اللي كنت بتسيبها على المرتبة وانت صغير (فاكر) وتعدي من عليها وانت بتبص لفوق على الخرطوم اللي عمل العملة السودا دي .
المشكلة ان المسألة اصبحت مستفزة والناس مش واخدة بالها ان المية اللي بيعملها التكييف دي مضرة اصلا ومش مية نقية وفي ناس كنت سامعهم بيقولوا انها السبب في الخرم ( خرم الأوزون يعني) .
المهم ان خلاص المية ما عدتش هتنزل والتكييفات ههتغطى ما بعد ما البامبرز جهقصدي الشتا وهنستنى الصيف مرة تانية لحد ما يشيلوا البامبرز وتبدأ مصر تتبول علينا مرة تانية ونحس بنفس القرف

ابراهيم عيسى لن ينحني

عاوزين ايه من ابراهيم عيسى؟

انك تكون معارض مش هي دي المشكلة لأن ما فيش حياة من غير خلاف في الرأي لأن دي تبقى حياة كئيبة ورخمة ومملة ومالهاش طعم ولا ريحة ولا لون المشكلة انك تبقى من غير اتجاه وناس هي اللي بتحركك وبتقولك تقول ايه . .
الناس بقت عارفة ان الراجل الطيب اللي بيشوفوه في التلفزيون اللي بيتكلم من قلبه وبيحب يقول اللي جواه من غير نفاق أو تلوين أو دهان وش الكلام باللون اللي كدابين الزفة ورمز الكوسا وأعوان النفاق وقلة الأدب بيستخدموه .

ابراهيم عيسى بقى بالنسبة للناس النفس اللي بيطلع وهما مش خايفين انهم ياخدوا على قفاهم من عسكري مدلدل ودانه ورا ضابط هو كمان مش فاهم حاجة بس الأوامر هيعمل ايه الغلبان.
ابراهيم عيسى اللي قال للنظام لأ مش هيخاف من تحقيقات هدفها تهزه وتخليه ينخ ، بس والله العظيم يا ظلمة عيسى عمره ما هينخ ولا هيطاطي زيكم واذا كان الغلابة اللي فاكرين ان مكانهم في الجرايد دايم لهم بيقولوا عليه بتاع اشاعات فهو الوحيد اللي قدر يوصل للناس من غير نفاق ومسح جوخ ولا تلميع نظام ،وصل للناس لأنه منهم واحد زيهم حاسس باللي حاسين بيه بهمهم. عارف هما مقهورين من ايه وعاوزين البلد يبقى شكلها ايه.
هيقولوا ان انا بنافقه وبكتب عشان ان انا صحفي في الدستور وعاوز اكسب رضاه عني ، خليهم يقولوا مش هتفرق كتير أصلهم فاكرينا في الدستور زي الصحفيين اللي عندهم لازم نسترضي رئيس التحرير عشان الشغل ينزل ويرضى عنهم ويتعينوا في المؤسسة المحترمة دي او اللي هما شايفينها محترمة ما تفرقش، بس يا ناس انا هقول حاجة واحدة بس مين فيكم يعرف المحررين اللي عنده كلهم مع فرق الاعداد برضه ؟سيبك من دي مين فيكم قعد مع الصحفيين بتوعه عشان يتفرج معاهم على ماتش للزمالك واتعصب لما الزمالك جه فيه جون وقام الأهلاوية هاصوا شماتة وبصلهم بنظرة كلها عتاب وهو بيضحك مع زعله على الزمالك الغلبان ، مين فيكم خد بإيد حد موهوب وعمل منه صحفي وما قفلش كل الأبواب في وشه وخلاه يندم على اليوم اللي قرر يبقى فيه صحفي ، مين فيكم حط ايده على كتف شاب زي الوردة عنده وقاله شد حيلك يا جميل شغلك حلو ؟ مين ومين ومين لو حطيته نفسكم في مقارنة مع ابراهيم عيسى انتوا الكسبانين بس كسبانين رضا زائف لنظام زائل اما هو كسبان حب الناس والاخلاص من كل واحد قلبه اتحرق من الخوف عليه في بيتنا الصغير اللي انا واحد فيه وما تمناش اني اسيبه مهما كان التمن حتى لو كانت نهايتي في البيت جنب أهلي لأني عندي اشرفلي أكون مع راجل جدع بيحب البلد دي ولا اكنش مع حد باع نفسه عشان حاجة كده ولا كده هتزول .
انتوا مش وحشين بالطبيعة بس يمكن الظروف اللي عملت منك كده ! يمكن الخوف على مكانكم خلاكم تحسوا ان القضية لو اتباعت هيكون احسن لكم ممكن لو كل واحد راجع نفسه لحظة وحس إن لحظة اعيشها وانا عارف قيمة اللي بقوله وماحدش قالي عليه احسن من عمر كامل عايش عشان اقول نعم وبس .
لسه في فرصة تصارحوا نفسيكم وتنسوا المكان وتفتكروا ان التاريخ ما بيفتكرش الا اللي زي ابراهيم عيسى عشان الناس بتحبه والتاريخ ما بيعترفش الا بحب الناس .
حب الناس اللي خلاص وصل لدرجة ان الراجل ده على حق ومش هنروح بعيد افتح مواقع الانترنت اللي غطت اخبار التحقيق معاه وشوف كام واحد بيحبه ومتضامن مع كل مواقفه عشان راجل جدع .
حب الناس مش حاجة بسيطة لأن حب الناس هو سر الخلود والاستمرار والكل لازم يعرف ان ابراهيم عيسى مش لوحده ووراه بلد وناس بتحب مصر ونفسها كل الناس تبقى ابراهيم عيسى وصدقوني محدش في الدستور وحش وعلى رأي المثل ما الطيو على اشكالها تقع واوعى حد يفتكر ان حد في الدستور اقل من حد لأ كلنا واحد وكلنا بنحب بعض وبنخاف على بعض من أول الغالي ابراهيم عيسى وحتى العمدة في البوفيه وكريم اللي واقف أمن كلنا هنا واحد وبنحب بعض ومش هنتخلى عن بعض مهما حصل ومهما اختلف الناس ان في الدستور كلهم واحد ومفيش فرق.
كلنا وراك مش نفاق ولا حاجة بس عشان عارفين انك صح يا ابراهيم ياعيسى عارفين انك جدع وهتقف معانا عشان نكمل اللي اتفقت معانا ان احنا نعمله الدستور هتفضل تقول للغولة عينك حمرا ومش هنخاف ياللي ربيتنا على الجدعنة وان الراجل كلمة وموقف بيأكد الكلمة دي وان الموجة مهما عليت برضه هنفضل واقفين ربنا معانا ومعاك ومع كل اللي بيحبوا مصر اللي فيها واحد زيك بيخاف عليها الله يباركلك ويباركلنا فيك يا أغلى الناس.
وكفاية حب الناس يا دستوري

حاجة واحدة بس هنقول عليها

كفاية ان الواحد مننا بيبقى فخور جدا وهوبيقول لحد من الناس اللي بيتعامل معاهم انا من جريدة الدستور عشان بنشوف في عينيه فخر اعجاب باللي احنا مؤمنين بيه واللي احنا عاوزين نحققه وما اعتقدش ان في حد بيبقى فخور بالمكان اللي بينتمي ليه زي ما الصحفيين في الدستور بيبقوا فخورين

قصيدة لواحد بيحب الريس جدا

سيدي الرئيس
في عيد ميلادك الكام وسبعين
كل سنة وأنت طيب
واحنا مش طيبين
كل سنة وأنت حاكم
واحنا محكومين
واحنا مظلومين
واحنا متهانين
ويا ترى يا حبيب الملايين
فاكرنا ولا احنا خلاص منسيين
فاكر المعتقلين
فاكر الجعانين
فاكر المشردين
فاكر اللي ماتو محروقين
فاكر الغرقانين
الله يكون في عونك - هاتفتكر مين وللا مين
في عيد ميلادك الكام وسبعين
بقول لك كلمتين
الأوله
شيلتنا طين
وهل تعلم أن النيل بقى رشاح
والجو أصبح بيئة والعيشة ولعة
والشرفا قلوبهم عالبلد والعة
وانت عاملهم مذبحة ولا بتاعة القلعة
والاقتصاد سداح
والسرقة بقت كفاح
ومصر متاحة بس للسياح
وعرض البلد بقى مستباح
والتانية
ورتنا الويل
دا الخطوة في عهدك بقت ميل
والضحك بقى نواح وعويل
والكوسة
عارف الكوسة
ممكن أقولك فيها موواويل
والجامعة بقت يا إما كباريه أو دار مسنين
والشباب معظمهم من غير خمرة سكرانين
والعلم عز على المتعلمين
والأساتذة بقم دجالين
والقادة بقم طبالين
واديني في الهايف يا حبيب الملايين
والتالتة
عارف اليابانيين
زمان في سنة اتنين وخمسين
كان عندنا تروماي وكان عندنا علم ومتعلمين
وثقافة ومثقفين
وأدبا وعلما وفنانين
وكانو اليابانيين
بالنووي لسة مضروبين
وللصدقة مستحقين
دلوقتي إحنا فين وهما فين
هما فوق واحنا في أسفل سافلين
والرابعة
أمن البلد بقى تنين
والمحاكم اتملت مظالم
والعدالة بقت كمالة
وكلمة الحق في الزبالة
وأصحابها في الزنازين
والخامسة
القطاع العام…. عام
والفساد…. ساد
وفي جتة بلدنا بيرعى
أفتكر لجنابك إيه وللا إيه
وكل ذكرى ليك بدمعة
آآآآآآآآه آآآآآآآآه
أنا كنت حالف ميت يمين
أكملهم لك تمنية وسبعين
بس هاكفيهم ورق منين
وكل سنة وأنت
واحنا طيبين

عاوزين نلعب في وش التاريخ

هو مش ممكن يكون التاريخ أساسا مزور أو مضروب ؟ إيه اللي يثبتلك إن الكتب الكتيرة اللي بتتكلم عن التاريخ بتقول الحقيقة ليه ما يكونش أهواء الناس هي اللي بتتحكم في كتابة التاريخ لو عاوز تتأكد من الكلام اللي أنا بقوله يا معلم هديلك المثال البسيط ده، لو بصيت في كتب التاريخ إفتح على واقعة معينة في كتاب تاريخ (أي واقعة ) وحفظتها زي إسمك وخلاص بقيت مقتنع إن الواقعة الفلانية حصل فيها كذا وكذا وكذا، وبعديها تفتح كتاب لمؤرخ مشهور غير المؤرخ التاني بس إتأكد إنهم على خلاف عشان تضمن الزبد سيادتك هتلاقي إن الواقعة اللي إنت حفظتها خلاص مش موجودة خالص وإن أبطال جديدة ظهرت على الساحة والحدث اتقلب كيانه واتغيرت ملامحه. ولو عاوز مثال تاني حي بص في كتب الضباط الأحرار اللي كتبوها بعد الثورة وطبعا دي مفيهاش هزار بس ركز لأنك هتلاقي الكام كتاب دول بيتكلموا في سكة غير بعض خالص لدرجة إن في وقائع معينة يا راجل كل الكتب ما اتفقتش عليها وفي كل كتاب منها هتلاقي بطل تاني وواقعة جديدة .
ده معناه إن التاريخ فعلا تحكمت فيه الأهواء، فإذا كان التاريخ الحديث اللي ناس شافته يعني مش عارفين نصدق فيه مين .. يبقى عاوزني أصدق اللي بيتكلموا عنه من أيام الفراعنة والتاريخ القديم للدولة القديمة والأسر والكلام الفاضي ده ؟ طب تيجي إزاي ؟
طيب لما الليلة بقت كده من حقنا نتكلم إحنا كمان على وقائع تاريخية من وجهة نظرنا إحنا ومالناش دعوة إذا كنا حضرناها ولا لأ لإن الموضوع ياسيدي إن إحنا عاوزين نلعب في وش التاريخ ونعمل فيه حوارات جديدة وبراحتنا وما حدش من حقه يحاسبنا لإن محدش فكر يحاسب المؤرخين اللي شوهوا وش التاريخ وعملوه شبه كلام الناس اللي شاربة حاجة والإتهام مش موجه لحد بس اللي على راسه بطحة يحسس عليها واحنا هنلعب زيكم في التاريخ بس من وجهة نظرنا مع إحترامنا لكل المواقف التاريخية.

أحمس طرد الهكسوس بصفقة طيارات الأباتشي الروسي

كلنا عارفين أحمس العظيم اللي كان السبب في طرد المعتدي الغاصب المحتل ورمى جنود الهكسوس برة مصر ومرمط بيهم الأرض بعد ما عمل الهكسوس الهوايل في مصر وبهدلوا خطوط التليفونات وقطعوا خطوط المترو بين أهرامات الجيزة و هرم سقارة المدرج وكان طايحين في الأتوبيسات بلطجة وبشل ومطاوي أصلهم بعيد عنك كانوا بيئة ما بيعرفوش يتعاملوا مع بني آدمين مش كلاس خالص وغير كده الوحشين كانوا بيستخدموا قنابل مسيلة للدموع وسط الزحمة في ميدان التحرير عند تمثال الملك أوزيريس لما عمال الهرم ينظموا مظاهرة أو إعتصام ضد المحتل الغبي وكام عسكري هكسوسي من اللي ما كانوش بيلبسوا دول تلاقيه ماسكفي إيده خرزانة وهاتك يا ضرب ع الملط كده عند المتظاهرين.
أبونا أحمس الدم جري في عروقه قام ضارب فاكس على مملكة شقيقة أو مش شقيقة مش مهم المهم اتفق معاها على انها تبعتله كام طيارة أباتشي عشان يربي بيهم ولاد التييييييييييييييت الهكسوس وفعلا المملكة العبيطة دي بعتت طيارتين جاررها 400 واحد عشان يكون أحمس أول واحد يركبها ،المهم بقى ان المقابل كان كام طن القمح اللي كانت مصر بتجيبهم في السنة بس أحمس ضحى بالشعب عشان مصر تعيش،شايفين البطولة ياجدعان.
الطيارات وصلت وأحمس قعد يتمرن عليها من تسع لست سنين لما هرش الليلة وقام هب طالع أول طلعة أباتشي في التاريخ كانت هايلة حتى إنه من عظمته قعد يخمس في الهوا ويعمل أمريكاني طبعا مش زعيم ، وبعد كده قام طالع على معسكر الهكسوس وهات يافحت قنابل وبتاع والرجالة تحت عمالين يردموا النفق اللي الهكسوس عملوه حوالين المعسكر وأحمس مش راحم لغاية الريس بتاع الهكسوس قام مقلع واحدة الجلابية الصيفي بتاعتها عشان الرجالة ما بيلبسوش وقام مشاور لأحمس بيها اعلان عن الاستسلام التام في مقابل انه ما يرميش القنابل اللي ريحتها وحشة دي، قام أحمس مطلع الميكروفون اللي خده من واحد من بتوع المظاهرات وقال له : " بص ياد يا بتاع الهكسوس لو كنت إنت ريس فأنا ملك ياد ولم العيال اللي معاك دول وشوفلك حنة تتلم فيها أحسن وديني أغرقك ها أغرق ؟" بعدها حلف ريس الهكسوس إنه ماشي خلاص وما عدش راجع وحياة مراته في الغربة.
عملها أحمس الوحش وحرر مصر من العدوان المهم إن بعد كده 70 % من الشعب مات من الفقر وقلة القمح
وخلينا نشوف التاريخ لسه مخبيلنا ايه؟

الأهلي حبيبي وشرياني أهداني بطولة مصرية

"اللهم ديمها نعمة وإحفظها من الزوال
ده أقل دعاء ممكن الأهلاوية يدعو بيه ربنا إن يديم عليهم نعمة حب وتشجيع النادي الرهيب اللي بقى سبب في رسم الفرحة في عيون كل أهلاوي حباه الله بحب النادي الأهلي
اللي عمله الأهلي امبارح في الإسماعيلي كان حاجة طبيعية ومتوقعة لأن الأهلي اتعود خلاص على حسم المواقف الصعبة دي لصالحه وهو ده الفرق بينه وبين أي نادي تاني واخد بالك من تاني دي الإهلي بيعرف يخلص في الوقت اللي الأندية المنافسة ليه بتبقى أحسن منه في المستوى بس الفرق الأهلي بيصنعه بصنعة حرق دم الفرق دي ولو حبيت تضرب مثال مش بعيد عندك الماتشين بتوع الدوري مع الزمالك و الإسماعيلي على التوالي واللي اتغلب فيهم الأهلي بس كان حاسم البطولة من بدري ومش فارق معاه الماتشين وبعد كده جه وقت رد القلمين للفريقين محدودي الخبرة وكانت الفرصة في الكاس وسبحان الله كان القدر ان ربنا يحطهم بالعكس في طريق الاهلي بالعكس يعني اسماعيلي بعدين أهلي وبصنعة لطافة الأهلي طرقع الاسماعيلي في نصف النهائي واداله اتنين بس وصعد للنهائي للقاء الزمالك في لقاء تاريخي زي ما بيقوله عليه لكن تاريخي لأن فرقة بقى تتقدم تلت مرات والفرقة الخسرانة تتعادل وتفوز بفرق الخبرة هو ده الفرق ...خبرة لعيبة ممكن تخسر ماتش مالوش أي لازمة وتفوز في ماتش تاني بيساوي بطولة
الفرق ان في لعيبة ما بتخافش من أي فرقة بتلاعبها والجمهور لا يشكل لها أي عبء في حين امبارح واحنا قاعدين ورا الجون تحس لعيب نادي الاسماعيلي كان بيدخل وعامل حساب الجمهور قبل ما يعمل حساب الحضري الوحش اللي كل لعيب من الاسماعيلي كان حاسس انه داخل يضيع
الأهلي حسم بطولة ماكانش محتاجها بس تعود الناس على ان فرقتهم تكسب بشكل متواصل ومش فارق معاهم يتغلب ماتش واحد في بطولة مش ممكن يكون مؤثر بأي صورة على سير البطولة و حصوله عليها بعد ذلك
الأهلي خلى الناس عايشة عشان تتنفس كورة
الأهلي مشكلته الوحيدة انه لازم يكون صريح مع نفسه ويعرف انه عنده قصور في الدفاع محتاج ترميم

الفجيعة

كان السوبر ماشي زي الفل والناس مبسوطة بس جه خبر خطف الزمالك للاعب شريف أشرف بمثابة كرسي في الكلوب نكد على الناس اللي فرحت اللي حصل يثبت ان عدلي القيعي بدأ العد التنازلي في الفشل بعد فلتان أكتر من صفقة من بين ايديه الموسم وكلها تقريبا راحت الزمالك فتح الله وخالد سعد ولو انه نفى بس مش مشكلة المهم عدلي القيعي يحاول يظبط الأمور ويصلح الأخطاء دي ويعيد ترتيب اوراقه لأن مهزلة اللي حصل مع شريف أشرف تموت من الضحك وهنتابعها واحدة واحدة ونعرف الفضايح الكتير اللي حصلت في الصفقة ومهزلة اتحاد الكرة والنادي الأهلي وعدلي القيعي نفسه

على العموم الله يعوضنا عنه خير لعيب جاب 32 جون الموسم اللي فات في الشباب طار مع الهوا مش مهم البركة في اولاد النادي المخلصين وده فرع اتكسر من شجرة النادي الكبيرة

المهم خدنا السوبر وحرقنا دم الناس الحاقدة

بيتحركوا عشان الكلاب المقتولة وما اتحركوش عشان الناس اللي بتتعذب ..منهم لله

الفرق بين البني آدم اللي مات من التعذيب والكلب اللي مات مقتول ان الكلب لقي حد يعبره

جرايدكتيرغطت خبر قتل 1252 كلب ضال في المنصورة، ومش كتيرة الجرايد اللي غطت خبر موت الراجل الغلبان اللي على الشمال اللي مات بعد التعذيب في قسم شرطة المنصورة

طبيعي ان ده يحصل والناس تزعل على الكلب قصدي الكلاب وما حدش يعبر البني آدم عشان فيه منه كتير ومحدش هيزعل عليه ده مات وهو بيتعذب ايه يعني ياراجل بكرة يطلع غيره ويتعذب ويموت فيها ايه ما الباشا اللي عذب اللي مات كان نفسيته تعباه وكان عاوز يفكها شوية قام معذبه وحظه كده مات أصله فقري ومش وش تعذيب هو كان يطول الباشا

ع العموم الحكاية إن 1252 كلب اللي اتقتلوا في الدقهلية هيلاقو بكرة (الصمبح) منظمات حقوق الحيوان والمنظمات الدولية والمدنية طالعة بتقول ازاي تعملوا كده في الكائن اللي كرمه ربنا ؟ حرام عليكو يا كفرة دي خلقة ربنا ومش لازم تموت مقتولة ياي حرام عليكم اهئ اهئ

وطبعا الريس فورم هيقوم باعت امين أباظة عشان يراضي الناس الزعلانة دي ويداديهم زي ما حصل أيام ما قتلوا الكلاب الضالة في الهرم والدنيا اتقلبت عشان شوية كلاب اتقتلت في الهرم والريس كان خايف صورة مصر تتهز أمام الجانب .

أما المصري الغلبان يموت يتحرق يتعذب يتحطله عصي مقشات يتكهرب مش مهم ده انسان حقير اتخلق من طين وفيه منه كتير دول 76 مليون مقرف قارفينا في عيشتنا لما يموت منهم ألف معذبين كل سنة مش كتير بس الباشا يبقى مبسوط والداخلية تبقى مزقططة وما فيش حد يفتح بقه لأنه هيشوف اللي شافه كل اللي اتعذبه وداقوا المرار من الظلمة وطبعا مين هيحاسب مين ما كلهم ايديهم ملطخة بدم الغلابة ومعلمة فيها قفا كل مصري اتهانت كرامته وما حدش اتهزله جفن عشان ينقذه ياناس حراااااااااااااااااااااام.

منهم لله هانوا الأصيل وابن الناس حتى المطحونين بهدلوهم ليه كده هو احنا مش بشر والا احنا بقينا أوطى من الكلاب ليه يار يس تخلينا نتمنى نكون كلاب عشان حقنا ما يضيعش عند اللي بهدلونا ولاد الكلاب

مش بإيدينا نقول غير حسبي الله ونعم الوكيل واحنا حاطين ايدينا على وشوشنا من قلم ظالم وكف غادر منكم لله يا كلاب

ليه مفيش حد اتحرك ولا ندد ولا شجب ولا قال عيب يا باشا هو الباشا مسنود من مين ده ربنا فوق والناس الحرة لسة موجودة ليه ما بنتحركش اتحركوا يا بشر قولو حرام يموت أب متعذب ويتحرق قلب أهله عليه ، حرام ابن يتخطف من بين اهله عشان يتحرق قلب أمه عليه وحرام شاب زي الوردة يتحرق عشان قال لالالالالالالالالالالالالالا ليه كلنامصممين نقول آه ليه كل أهاتنا تفضل آه وراها آه وكلها آهات ألم

موضوع جامد مووووووووووووووت

إتحاد ملاك مصر

حدث فى المحروسة ..الرئيس بجلالة قدره راح إسكندرية عشان يفتتح فندق

كتب الزميل / محمد المعتصم (صحفى بجريدة الدستور)إقرأ

.........
خلال زيارته الاخيرة للاسكندرية للاحتفال بتخريج الدفعة رقم 35 من طلبة كلية الدفاع الجوى قام الرئيس بافتتاح فندق "فور سيزون سان ستيفانو جراند بلازا " لتكون المرة الاولي التي يفتتح فيها الرئيس أحد الفنادق دون أن يفتتح معه أي مشاريع أخرى..تخيل رئيس دولة بحجم مصر يتحرك ومعه مجلس الوزراء وما يتبعه ذلك من تأمين شامل للمنطقة لكي يفتتح فندق لاحد المستثمرين.. وهو ما طرح عشرات من علامات الاستفهام علي سر الاهتمام بهذا المشروع تحديدا و علاقة رئيس مجلس إدارة الشركة المالكة للفندق برجال الحكم والدعاية المجانية التي حصل عليها الفندق في التليفزيون المصري ومحطاته والاذاعة ومواقع الحكومة علي الانترنت والصحف القومية التي أفردت له مساحات كبيرة بسبب اهتمام الرئيس به.
صاحب صاحبهمالك الفندق مجموعة طلعت مصطفي التي يترأسها هشام طلعت مصطفي عضو مجلس الشوري وعضو المجلس الأعلى للسياسات ورجل الاعمال "الضخم" والمتشعب العلاقات داخل وخارج مصر والصديق المقرب لجمال مبارك.. وهي أسباب قوية وكافية ليتحرك موكب الرئيس لافتتاح الفندق.. وصداقته لجمال مبارك هو أمر يعرفه كل من يعمل في البزنس وكل من اقترب من البيت الرئاسي.وهي الصداقة التي وفرت علي هشام طلعت مصطفي الكثير من الوقت والمجهود لتذليل العقبات التي تواجه أي رجل أعمال في بلد تتميز بكم قوانين طارد لرأس المال وهو ما حاول مصطفي رده – بقدر المستطاع وبقدر ما هو معلن ومتاح – للنظام في مناسبات عدة لعل أبرزها محاولة إسكات خصومه والضغط عليهم وهو ما حدث في الجلسات التي عقدها هشام مع رئيس مجلس إدارة جريدة خاصة معروفة بهجومهما الشديد علي الرئيس ونجله وتعارض بشدة عملية التوريث.وفي هذه الجلسة عرض عليه مشاركته في الجريدتين بنسبة 49 % - كان من المقرر ان يدفع 50 مليون جنيه – بدون ان يتدخل في الإدارة أو التحرير والاحتفاظ بطاقم التحرير كل هذا في مقابل ثلاثة شروط أولها وأهمها هو التوقف عن الهجوم علي جمال مبارك.
الدولة كلها تفتتح الفندقتوقفت الحياة تماما في كورنيش الاسكندرية.. فالدولة بأكملها كانت تفتتح فندق.. الرئيس كان هناك و رئيس مجلس الوزراء الدكتور أحمد نظيف و كان هناك ووزير الإسكان المهندس أحمد المغربي ووزير الاستثمار الدكتور محمود محيى الدين ووزير النقل المهندس محمد لطفى منصور ووزير التجارة والصناعة المهندس رشيد محمد رشيد ومحافظ الاسكندرية اللواء عادل لبيب كلهم كانوا هناك يشاركون الرئيس في عملية الافتتاح التي تسببت في إخلاء شوارع الأسكندرية.قامت قوات الأمن المركزي بإخلاء طريق الكورنيش بداية من منطقة أبي قير وحتى قصر رأس التين مقر إقامة الرئيس وهو ما أزعج أهالي الأسكندرية والمصطافين الذين هربوا من القاهرة وحرها ففوجئوا بالدولة كلها تأتي خلفهم وتحاصرهم قوات الأمن في سياراتهم وتمنعهم من الحركة لأن الرئيس قرر افتتاح فندق سياحي.
تثبيت الرئيسوقد وصل الرئيس إلى الفندق ظهر الثلاثاء حيث قام بجولة تفقدية بعد أن أزاح الستار عن اللوحة الجدارية إيذانا ببدء المشروع مضفيا عليه صفة رئاسية تمنح صاحبه صلاحيات وعلاقات لا يعلم مداها الا الله خاصة وأن الرئيس لم يكتف بازاحة الستار عن اللوحة الجدارية بل أنه أشاد بما وصفه بأنه صرح سياحي كبير يوفر آلاف من فرص العمل لابناء الأسكندرية.. وهي الجملة التي التقطها هشام طلعت مصطفي وهو يأخذ نفسه قبل أن يقول أن الفندق وفر عشرة آلاف فرصة عمل أثناء عملية الإنشاء وستة آلاف فرصة عمل أخرى للتشغيل كما ضخ مئات الملايين كعائدات ضرائب ومئات الملايين من النقد الأجنبى الناتج عن تشغيل الفندق وبيع الوحدات السكنية لصالح الاقتصاد القومي.إن مشروع "سان ستيفانو" يعد من النتائج البارزة الدالة على نجاح سياسة الخصخصة فى مصر وعرض رئيس مجلس إدارة الشركة فيلما تسجيليا استعرض فيه انجازات شركته فى منطقة الساحل الشمالى وفى المدن العمرانية الجديدة.. وقال أن تشجيع الرئيس مبارك كان وراء إنشاء مدينة الرحاب التى تستوعب مئات الآلاف من السكان وان دعمه للمشروعات الجديدة كان وراء فكرة اقامة مشروع "مدينتى" التى بدأ تنفيذها وينتظر أن تضم 600 ألف نسمة.. وقد كان الرجل صادقا وهويتحدث عن تشجيع الرئيس له.. بذمتك شفت تشجيع أكتر من أن الرئيس يأخد الدولة كلها ويروح يفتتح فندق لواحد صاحب ابنه.

هو لسة في لبن أصلا

بعد الغش الفظيع في اللبن كان لازم نستفسر عن سبب اختلاف أسعار اللبن في كل حتة في مصر مع إن اللبن في السوق دلوقتي كله بودرة سيراميك وزهرة واشرب يا شعب أبونا الحج مبارك راعي الغلابة والمشردين في البلد دي

محافظ الشرقية المحترم كفاية كده

مساء الفل ياباشا احنا بنمسي بس ما يلزمش ايتها خدمة ؟

طب سلامو عليكو

أحمد المغربي وزير الحلة والجركن

مصطفى شحاته كتبها في جريدة الدستور

مرور القاهرة في الضياع

تم نشره في الدستور اليومي في صفحة 15 كل حاجة

نتيجة كلية الشرطة 100% عشان خاطر الريس

إذا كانت نتيجة التخرج 100 % فمن أين يأتى الفساد فى الشرطة

منذ ان أنشئت كلية الشرطة ونتيجة التخرج فيها لاتقل 99%في كل عام

قطرى " أطالب بأن يكون القبول فى كلية الشرطة بعد دراسة الحقوق حتى لا يختلط الحابل بالنابل داخل الكلية ونرى هذه النتائج المبهرة "

كتب / مصطفى شحاته ( صحفى بجريدة الدستور) إتعلموا

بعيدا عن حضور الرئيس كل عام لحفل تخريج دفعة جديدة من كلية الشرطة والذى يعتبر أكبر دليل على إعترافه

بهؤلاءالاشخاص الذين يسحلون الشعب المصرى فى أقسام الشرطة ، فأننا ننظر لجانب آخر من هذه الكلية وهى نتيجتها التى يتمطع مديرالكلية كل عام وهو يعلنها أمام الرئيس مبارك وأعضاء حكومته المبجلة قائلا " صدق الرئيس مبارك رئيس الجمهورية والقائد الاعلى لهيئة الشرطة على نتيجة كلية الشرطة هذا العام والتى بلغت نسبة النجاح فيها 100 % " هذا بالنص ما يعلنه مدير الكلية كل عام على مسامعنا فى الاحتفال التاريخى للتخرج .
فدائما ما كانت تعلن نتيجة الكلية كل عام بنسبة نجاح 100 % أى انها الدرجة النهائية فلايوجد راسبين فى الدفعة ، وقد أعلنت هذا العام نتيجة الكلية بنسبة نجاح 99.2 % آه والله _ بس محدش يفتكر ان فى ناس راسبة _ وذلك كما أعلنها اللواء طارق يسرى مساعد وزير الداخلية ورئيس أكاديمية الشرطة .
ما نتعجب له إن كلية الشرطة تشترط فيمن يتقدمون لها أن لايقل مجموعهم فى الثانوية العامة عن 65 % وكلنا يعلم من هو الطالب الذى يحصل على 65 % فى الثانوية فهو الطالب الذى لم يرى الكتاب طوال العام ولم يذاكر سوى قبل أيام الامتحانات بأيام قليلة ولن نشكك فى ذاكرة الطلاب الذين يدرسون فى كلية الشرطة ولكن بالعقل كده أزاى الطلبة دى اللى مكانتش قادرة تطلع من الثانوى تكون نتيجة تخرجهم فى الكلية 99 % ، كما أن جميعنا يعلم أن معظم هؤلاء الطلبة من أبناء رجال الشرطة ومسئولين كبار فى الدولة أو ممن يتستمدون قوتهم ونفوذهم من المال يعنى من الآخر بيدفع علشان يدخل الكلية ، يعنى هل فاقت ذاكرة وقدرات هؤلاء الطلبة مرة واحدة فى كلية الشرطة ؟!!!! وبالطبع ده مينفعش يكون راجع للإلتزام والإنضباط لأنهم لن يغيروا شيئا بداخل ذاكرة الطالب التى عفى الزمن على بعضها .
ومن ثم المفروض أن جميع الطلبة بداخل الكلية متفوقين بم أن نتيجتهم 99 % فماذ يحدث لهم بعد التخرج كيف يكونوا متفوقين فى الكلية ثم يخرجون للحياة العملية فى أقسام الشرطة أو غيرها من توابع وزارة الداخلية ، فنرى اشخاص اخرين ، ومن هنا لما النتيجة 99 و 100 % أمال الفساد بيجى منين ، بمعنى أن النتيجة دى مستحيل تكون واقعية .
وعن ذلك يتحدث محمود قطرى عميد شرطة سابق قائلا إن الفساد الذى يتهم فيه ضباط الشرطة ناتج من فساد الاكاديمية التى تخرجوا منها فقد كان طلاب كلية الشرطة يدرسون المواد الحقوقية تبعا لجامعة عين شمس قبل أن تتحول كلية الشرطة إلى أكاديمية عام 1974 وكان طلاب الشرطة يمتحنون مع طلبة حقوق عين شمس فى نفس الوقت واللجان ونفس الإمتحان وهذا كان يؤدى بطلاب كلية الشرطة إلى المذاكرة الجادة هربا من شبح الرسوب لأن المصحح دكتور فى الجامعة مش فى الشرطة ولذلك كنا نرى تأخر العديد من الطلاب فى الدراسة بكلية الشرطة نتيجة الحزم الذى كان موجودا فى ذلك الوقت ، ولذلك يمكننا المقارنة بين نتيجة الكلية هذه الايام ونتيجتها قبل تحولها لأكاديمية بعد عام 1974 وتحول الكلية إلى أكاديمية ثم بدأت وزارة الداخلية فى إعداد كادر أكاديمى من خريجى الكلية للتدريس بها وبعد كده بدأت التدخل فى نتيجة الكلية ومن سنتها وهى ما بتقلش عن 99 % ويتابع قطرى قائلا انه كيف تكون نتيجة ليسانس الحقوق 99 % ده عمره ما حصل فى أى كلية حقوق وأسئلوا أساتذة الجامعات عن الموضوع ده هيقولوا أن ده مستحيل والخريجين كلهم دون المستوى خاصة فى المواد القانونية والذى يثبت جهل الضباط الخريجين بالقانون هو إرتكابهم لأفعال ضد القانون بدليل قدرة وكلاء النيابة على إكتشاف تلك الاخطاء وإخلاء سبيل بعض المتهمين الذين يقدمهم ضابط الشرطة على أنهم متهمين بالاضافة الى قدرة المحامين على إكتشاف أخطاء الضباط فى عمليات الإمساك بالمتهمين متلبسين بالجرائم ، وكذلك قيامهم بعمليات التعذيب فلو الطالب ده درس فى الكلية القوانين صح _ حتى وإن كانت لا تنفذ _ فسيكون هناك رادع له عند إرتكابه أى منها حتى لو كانت نفسه .
ويطالب قطرى الذى أكد أنه سوى معاشه مبكرا لما رأه من تجاوزات بوزارة الداخلية بأن يكون القبول فى كلية الشرطة بعد دراسة الحقوق حتى لا يختلط الحابل بالنابل داخل الكلية ونرى هذه النتائج التى تبهرنا .

الغريب أن مبارك فى كل عام يكون فرح ومنبهر بهذه النتائج التى تأتى لمسامعه من مدير الكلية ولا نعرف كيف يصدقها لأنها غير معقولة أبدا .
النتيجة دائما ما تعلن بنسبة نجاح مائة فى المائة والعام الذى تخرج فيه النتيجة بنسبة نجاح 99 % أعلم أن هناك طالب أو أكثر لم يؤديا الامتحان نظرا لظروف مرضيه أو غيره بمعنى أن نتيجة طلبة الفرقة الرابعة كلية الشرطة لازم تكون تمام أمال الرئيس هيجى يحتفل بناس ساقطين طبعا لا لأنه دائما ما يساند المفوقين ، ولا نعلم هل الكليات المدنية لايوجد بها خريجين حتى يحتفل بهم مبارك ويقصر وجودهم على مجموعة قليلة يتم إختيارهم بعناية من الطلبة الموالين للنظام ويقوموا بتقديم هدايا تذكارية للرئيس ، وكذلك فى بعض الاوقات يلتقى الرئيس بالطلبة المدنيين فى لقاء سنوى يتم فيه إختيار الطلبة الحضور ومعرفة أسئلتهم حتى لا يخرجون عن النص ويحرجون الرئيس

خدعوك فقالوا قطبي الكرة المصرية

من زمان اوي والناس عارفة ان مصر أهلي وزمالك بس وعلى استحياء دخل الاسماعيلي في اللعبة مؤخرا ولو انه ما بيدخلهاش إلا كل عشر سنين أو أكتر
ومن زمان برضه والناس بتردد عبارات من نوع قطبي الكرة المصرية ناديا الأهلي والزمالك وفردتين الميزان في مصر ولو كفة طبت الكرة في مصر هتنتهي.
الكلام ده كان زمان لأن القطبين في اللغة لازم يكونوا متساويين في القوة وكل قطب فيه المميزات اللي عند التاني ومفيش فرق بينهم وأكبر مثال على كده القطبين أيام الحرب الباردة لما كان الاتحاد السوفيتي راسه براس امريكا وواقفلها زي العمل الردي وأول ما انهار السوفييت بقت امريكا تخبط وترزع وتهبد في كل الدول حتى الاتحاد السوفيتي أو روسيا ما سلمش من قفواتها ومحدش قادر يقلها لع بما معناه ان امركا بقت القطب الأوحد في العالم كله بدون منافس وده بالظبط اللي حاصل عندنا فلك أن تتخيل ان الأهلي هو القطب الأوحد في الكرة المصرية والزمالكوية ينسوا حكاية القطب التاني لأنها بطلت خلاص وبقت ماسخة ومعيشاهم في الوهم طيب بأمارة ايه الزمالك قطب؟! بالبطولات اللي خدها أنا أعرف ان القطب بيبقى قد القطب التاني انما فرقة واخدة 33 بطولة دوري ازاي يبقى الفرقة المقابلة ليها واخدة 11 بس مش حرام يا جدعان فرقة مش عارفة تغلب الأهلي في الكاس من كام واربعين سنة دي تبقى قطب ؟ فرقة لما تغلب الأهلي وربنا يكرمها يبقى الأهلي واخد الدوري من اسبوعين فاته مش حرام يسموها القطب التاني للكرة المصرية .
ده يا راجل لو سألت الزمالكاوي نفسه مين فرق الدوري المصري هيقول بمنتهى التلقائية الأهلي وبعدين الزمالك هو ده الواقع المرير اللي الزمالك مش راضي يقتنع بيه .
قطب ايه ياجماعة اللي الهلال السوداني يمسح بيه نجيلو الخرطوم والقاهرة الا ما سمعنا ان الاتحاد السوفيتي انضرب على قفاه من تايوان مثلا ؟ يا راجل بلا وكسة أقطاب تعبانة صحيح . يجيه ايه جنب المرعب النادي الأهلي سيبك....

سعد الصغير أثبت ان احنا لسة عايشين في النكسة

أثبت الفلتة الفنان سعد الصغير حبيب الحميربما لا يدع مجالا للشك إن مصر لسة عايشة في عهد النكسة بتاعة من سبعة وستين لغاية دلوقتي عارفين ازاي القصة ان كلمة السر كانت وقت النكسة اثناء الحرب دي عنب - عنب - عنب

وجه سعد الصغير بعد أربعين سنة عشان عشان يغني أغنيته اللي كسرت الدنيا ودغدغت الأفراح عشان تثبت للجميع إن مصر كلها لسة عايشة في النكسة وان احنا لسة ما فوقناش منها .فعلا مصر لسة عايشة في غيبوبة والغريب ان الناس عارفة ان احنا دلوقتي عايشين ايام اصعب من أيام النكسة بس الفرق ان أيام النكسة في سبعةوستين كان في مبرر الحرب عشان يرضوا بالعيشة المهببة دي أما دلوقتي واحنا بنعيش احلى أيام الاستيكرار ليه برضه العيشة زي الطين ومحدش راضي بحياته وده حقه لأسباب كتيرة جدا بداية من الكبد اللي اتهرا والكلية اللي اتكوت والمرارة اللي اتشالت ولا الدم اللي اتسرطن ولا الأكل اللي ماعدلوش طعم الواحد مابقاش عارف يلاقيها منين ولا منين من الدنيا وبلاويها ولا من ايه ولا ايه؟

المظاهرات في مصر ماركة اهي ماشية عما ربنا يفرجها

المظاهرات في مصر حاجة تانیة خالص ملهاش دعوة بالمظاهرات اللي بتحصل في العالم كله لأن هناك الناس متحضرة (واحد هیقولي بزعل یعني احنا مش متحضرین یا افندي ) اقوله لا یا سیدي احنا اساس الحضارة والتحضر في الكون ده احنا اللي دهنا الهوا دوكو , المسألة ببساطة مش حضارة ومش عارف ایه من الكلام الكبیر ده , الحكایة في طریقة عمل مظاهرة والفرق بین مظاهراتنا هنا ومظاهرات الغرب (اللي خد الحضارة مننا ) ان هناك لما یقولوا یا مظاهرة مش محتاجین موافقة أمنیة علیا العملیة مجرد إخطار للجهة الأمنیة التابع لها منطقة التظاهر بس ومش لشئ مش لحاجة غیر انهم یعملوا حسابهم علشان یحموا المتظاهرین مش بالشوم على دماغهم (انا ما بلسنش على حد لا سمح الله ) بعد كده بیطلع المتظاهرین في منتهى الشیاكة ویقفوا قدام المكان اللي هیتظاهروا فیه وكل واحد بجنتلة یقوم مطلع الیافطة بتاعته وعلیها عبارات الاحتجاج والشجب (حلوة الشجب دي) بدون كردون من عساكر الأمن اللي بیحوط الناس عندنا لدرجة انك بتفتكر ان المظاهرة بتاعة العساكر أصلا مش الناس (والله ما قصدي یا باشا ) , المهم بیفضلوا واقفین بدون ما حد یمد ایدوا على حد لو هاصت وفرطت منهم ع الأخر تلاقیهم بس بیرددوا عبارات من الجامدة اللي في كل المظاهرات زي (یسقط كذا , لا لل.......) وحاجات من دي یعني ولا یمكن تسمع لفظ خارج (أو داخل حتى) وتنفض المظاهرة ولا اشتباكات ولا اعتقالات الناس عبرت عن نفسها والأمن حماهم و أدى دوره من غیر ما حد یتأذى أو یتطاول على حد .”
عندنا في مصر( ولا مؤاخذة یعني لو هتسمحولي أتكلم من غیر قفوات أو زعل إحنا بنتكلم بس ) هتلاقوا العجب العجاب نبدأ من الأول من أول ان الدستور بینص على إن لازم أخد موافقة الجهات الأمنیة على إقامة مظاهرة وطبعا المسألة في منتهى البساطة كل اللي علیك تعمله انك تتحایل على المسئول بتاع الأمن في الحتة التابعة لیها المظاهرة حوالي جمعتین تلاتة( والله ما أكتر الشهادة لله ) الناس في منتهى التعاون بعدین هتتلكك إن سبب المظاهرة بطل خلاص ابقى عینها في التلاجة هي الناس هتقطع نفسها یعني
معلش یا باشا الناس مش مقدرة تعبكم, بس یا باشا هي المواضیع دي بتتأخر لیه ؟! خلاص... أنا بسأل بس ) المهم یا عم معاك الموافقة قشطة هیص بقى ولمیت الخمسین واحد اللي هیطلعوها ومعادكم بعد الصلاة ( اشمعنى دایما بعد الصلاة ؟خلاص ما تزقش أنا كنت بستفسر ) طبعا الموافقة دي نعمة لا تقدر بثمن غیرك مش طایلها ( عارفین مین غیرك ده ,هسس للباشا یسمعنا یفتكرنا معاهم ,تمام یا باشا كله میت فل وعشرة) . طبعا لما هتروح تتجمع علشان تقوموا بالمظاهرة (آو تقعدوا بیها لو تقیلة هتلاقي لكل متظاهر أربع عساكر أمن مركزي حارسینه عن شماله وعن یمینه ومن أمامه ومن خلفه یعني الخمسین بني ادم اللي هناك محاوطهم من العین 200 عسكري اسم النبي حارسهم وصاینهم ( والنعمة ما بتریق), المهم المظاهرة تبدأ من هنا والألفاظ التي یعاقب علیها القانون تشتغل من هنا , الأب بیدخل في الموضوع لیه؟ ما تعرفش مع انه مش موجود بس غلط برضه وخلف عیل أهبل بیطلع مظاهرة , وبعد الشتیمة تبدأ عملیة الإشتباك بالأیدي و تسلیم الأكتاف بین الطرفین مع انهم كان شكلهم حلو في الأول وكله بیضرب في كله (ممكن یبقى عسكري أمن ولیه أخ في المظاهرة و ساعة الضرب ولا یعرفوا بعض دي أوامر یابا ) المهم ضرب ,سب , تراشق باللي في الإیدین , وتكسیر كل اللي یقابلهم في المعركة كله في سبیل الوطن (ایه الجو ده ؟ انا ماشي وهكمل من بعید !) كل یجاهد في سبیل القضیة انهي قضیة ماحدش عارف احنا لازم نضحي بالأمن والمتظاهرین عشان المظاهرة تعیش وتنجح وتتسمع وتطلع في العاشرة مساءا (بس.. كدة اتصیت یا معلم تطلع في البرنامج تقول :”العالم ولاد التیییییییییت(حذفت لإنها شتیمة ) مش عاوزنا نبدأ المظاهرة واحنا كنا واخدین موافقة نقف احنا الخمسین في الخمسة متر دول بس الصراحة واحد مننا حب یروح التلاویت ولا مؤاخذة قاموا ولاد التییییییت ( اتحذفت عشان الرقابة) نزلوا ضرب فیه كأنه عدى سور إسرائیل , إحنا ماسكتناش ردینا علیهم والحمدلله طلعنا بأقل الخسایر وعندنا ضحیة واحدة بس “,بعدها تحط الإعلامیة منى الشاذلي ایدها على دماغها وتقول :”أنا مش عارفة كل ده لیه ؟!, الناس طالعة مظاهرة سلمیة لیه القلق ده كله ؟!”, ولمعرفة ا لحقیقة مكتملة من جمیع الأ طراف معانا اللواء نبیل لوقا بباوي الكلام ده كله كذب وادعاءات الحقیقة (وباقي الكلام انتو عارفینه وبتسمعوه في كل برنامج بیطلع فیه). وكده خلصت المظاهرة وشد وجذب من كل الأطراف و ما حدش عارف مین عنده الحق العیال المترمیة في السجون بجریمة التظاهر أو التجمع بعدد یزید عن الخمسة طب ما انتو اللي ادیتوهم اذن ) “وله احنا ادیناهم اذن لمظاهرة سلمیة إنت هتخرف لا یا باشا ده أنا بهزر بس وبكلم نفسي حتى شوف امشي یا نفسي ) ,ولا الحق عند الضباط اللي عایزین یحافظوا على أمن البلد وفقا للقانون المسمى بالطوارئ أو المعدل لقانون مكافحة الإرهاب (یا جماعة دي أوامر وما حدش عنده استعداد یقف قدام القانون بس صوابعك مش زي بعضها , عندك الباشا بتاعنا عسل والنعمة عسل ) مش مهم مین صاحب الحق لأن كلهم مجرمین (ماعدا انت یا باشا) في حق مصر اللي خلو رقبتها زي السمسمة قدام الناس التانیة والفضیحة بقت ع الهوا في الجزیرة والفضائیات اتقوا ربنا في بلدكم وخلینا نطلع مظاهرة مرة واحدة من غیر احتكاك أو قلق ومن غیر ما حد یحس بینا لأن مهما تظاهرنا بدون هدف ویكون التخریب هدفنا الأول كنوع من أخذ التار من الحكومة و رجالاتها . الكلام جمیل بس التنفیذ صعب لأن الكل مستني ومتربص على غلطة للطرف التاني والنتیجة عداء أزلي انزرع بین الشعب ورجال الأمن اللي هما في الأساس بیحموا الشعب (ایه الكلام الكبیر ده یاد؟). امتى هنخلص من جهل الممارسة الغلط لحقوقنا الدیمقراطیة